I bin grod voll depressiv, bitte net ansprechn. ^^

Irgendwie hob i ma wohl grod wieda Gedonkn üba mei (sinnloses) Lebn gmocht ...
I vabring fünf Tog de Wochn mit Schul gehn und in da Stodt umma gammln. I bin echt so irre froh, doss i de Julä kenn und doss i mit ihr so vül Spaß hob und de Zeit so richtig genieß und olles. Oba sobold i donn ham kumm und de Julä weg is ... jo, wos hob i donn noch? Wos wüll i ihm Lebn und wos würd mi eigntlich wirklich dauerhaft glücklich mochn? Wos is mei Ziel? Wos is ma eigntlich wirklich wichtig? Und wem bin i wichtig?

Meinen Öltan definitiv net. I bin heite ham kummen und mei Mum hot (natürlich) telefoniert und irgendwem wieda mol de Gschicht wo i beim Alex woa azöhlt. Und i bin heulend (jo, i woa/bin echt depri) bei ihr vorbei ins Esszimmer gongn und sie hot mi anfoch ignoriert. Donn is mei Paps kummen und wegn dem hot se aufglegt, weil der sich sei Essn jo net sölbst worm mochn konn.

I bräucht in meim Lebn anfoch wos Dauerhoftes. Etwos, von dem i was, doss es net so schnöll wieda vagehn werd. Oba im Lebn hölt ebn nix ewig und olles is irgendwonn vorbei. Des hob i in meim bisherign Lebn leida schon oft genug gmerkt. Is des vielleicht der Grund, wieso i nie gonz mit meim Lebn zufriedn bin, a wenns eigntlich grod schen is? Weil i was, doss es net long so bleibn werd? Und weil jeda Fehla olles kaputt mochn konn ...

Des Lebn is so kurz und mei Jugnd is eh schon fost wieda vurbei. Wenn i aufn Kalender schau, donn konn i goa ned glabn, doss seit bestimmtn Ereignissn schon so vül Zeit vagongen is. Oba de Zeit vergeht so unfossbor schnöll. Wos wird in am Johr noch do sein von dem, wos ma jetzt wichtig is? Wenn i mol drüba nochdenk, wie vüle Menschn i in meim Lebn schon aus den vaschiedestn Gründn valorn hob ... echt, es kotzt mi voll on, wie schnöll de Zeit vageht! Jeda Tog is so schnöll vorbei und es passiert anfoch nix, wos dauerhoft sein kennt oda wos de Zeit irgendwie longsoma lafn losst oda kA ...

Wenn i depri bin, nimmts sowieso kana ernst. I hob jo a eigntlich kane Probleme. I hob nur Ongst vur ollem Neuen und a Ongst davua, doss olles aufhean kennt.

Jetzt was i, wos mei Problem is! I holt mi an irgendwölchn Sochn fest und wenn bei denen wos folsch laft, gehts ma anfoch Scheisse. Wenn mei Lebn kan Sinn hot, donn suach i ma sozusogn an aus. Für dos leb i donn. I denk ma mol, doss des jeda Mensch unbewusst so mocht, oba wos bringts am? Irgendwonn gehts schief, weil olles irgendwonn schief geht. Nix is für de Ewigkeit, irgendwonn valiert man olles. Warum bin i also so dumm und moch mein Seelenfriedn an irgendam Schaß fest?

I bin echt dumm ... ka Wunda, doss i mei Lebn für sinnlos holt ...